ՈՒՂԻՂ ԵԹԵՐ
192 Kbps
128 Kbps
64 Kbps
48 Kbps
Arm Radio FM 107
Vem Radio FM 91.1
Im Radio FM 103.8
Արևմտահայերէն լուրեր , Դեկտեմբեր 7-ի եթերը
2018-12-07 14:34:47

Արևմտահայերէն լուրերուն մէջ կը լսէք.

-Այսօր հայութիւնն ամբողջ կը յիշէ Սպիտակի ահեղ երկրաշարժի երեսնամեակը:

-Հայաստանը պիտի ստանձնէ Եվրասիական Տնտեսական Միութեան նախագահութիւնը:

-Անգլիոյ Տարպի քաղաքապետական խորհուրդը պաշտօնապէս ճանչցաւ Հայոց Ցեղասպանութիւնը:

0:00
0:00

Այսօր հայութիւնն ամբողջ կը յիշէ Սպիտակի ահեղ երկրաշարժի երեսնամեակը :

1988 թուականի Սպիտակի աղիտալի երկրաշարժի 30 երկվայրկեանները շուրջ 25 հազար մարդու կեանք խլեց, դեկտեմբեր 7-ին մեր երկրին 1/3-ն աւերակներու վերածուեցաւ՝ անօթևան թողնելով հարիւր հազարաւոր մարդ: Սպիտակի և Կիւմրիի շինութիւններու 80 տոկոսը քանդուեցաւ։

Մարդկային և նիւթական կորուստի առումով աննախադէպ այս աղէտին Հայաստանն անպատրաստ էր ։ Առաջին իսկ օրերուն աջակցութեան ձեռք մեկնեցին 113 երկիրներու կառավարութիւններ, միջազգային կառոյցներ ու կազմակերպութիւններ, անհատներ։ Այդ օրերուն մեր երկրին բժշկական և փրկարարական օգնութիւն ցուցաբերուեցաւ, սնունդ, հագուստ և դեղորայք, դրամական միջոցներ տրամադրեցին և ապրելու համար անհրաժեշտ այլ պայմաններ:

Այդ օրերուն Երևանի մէջ ուսանողներն անգամ կ’ուզէին հասնիլ երկրաշարժի գօտի, հասնելու օգնութեան իրենց քոյրերուն և եղբայրներուն:

Հայաստանի ու սփիւռքի հայկական գաղութները այսօր յարգանքի տուրք կը մատուցեն 1988 թուականի երկրաշարժի զոհերու յիշատակին:

Մեր երկրի վարչապետի պաշտօնակատար Նիկոլ Փաշինեան, կառավարութեան անդամները, Ռուսաստանէն, Ամերիկայէն, Գերմանիայէն, Պելառուսէն ժամանած բազմաթիւ հիւրերու հետ, կ’այցելեն Կիւմրի, ուր տեղի կ’ունենայ Սպիտակի երկրաշարժի 30-րդ տարելիցին նուիրուած «Յիշատակի և աղէտներուն դիմակայունութեան օր» խորագիրը կրող միջոցառումներու շարքը:

Ցաւալի է, բայց պէտք է խոստովանինք. այսօր ալ ամբողջապէս չենք յաղթահարած 88-ի երկրաշարժի հետեւանքները: Դեռ կան աղէտէն տուժած, բնակարան չունեցող ընտանիքներ: Պաշտօնական տուեալներու համաձայն՝ 542 ընտանիք բնակարանի կարիք ունի: Պետութիւնը կը խոստանայ մինչև 2020 թուականն այդ հարցը լուծել: Մասնաւորապէս, այս տարուայ պետական պիւտճէյով ծրագիրի իրականացման համար յատկացուած է մօտ 460 մլն դրամ:

Մայր Աթոռ Սուրբ Էջմիածինի Գարեգին երկրորդ Ամենայն Հայոց կաթողիկոսի նախագահութեամբ կը կատարուի հոգեհանգստեան արարողութիւն: Մակար Եկմալեանի «Պատարագը»՝ Հայաստանի պետական ազգային ակադեմիական երգչախումբի կատարմամբ կը հնչէ Վանաձորի Սբ. Գրիգոր Նարեկացի եկեղեցւոյ մէջ:

Այս տարի շարք մը ուշագրաւ նախաձեռնութիւններով հանդէս եկած է մշակոյթի նախարարութիւնը: Սպիտակ քաղաքի Մշակոյթի տան մէջ Հայաստանի պետական ֆիլհարմոնիկ խումբը հանդէս կու գայ երկրաշարժի 30-րդ տարելիցին նուիրուած համերգային ծրագիրով: